वीर अस्पतालअगाडि थर्मसमा चिया बेच्ने महिलालाई महानगरद्दारा लछारपछार
काठमाडौं । काठमाडौं महानगर प्रहरी बलले वीर अस्पतालअगाडि थर्मसमा चिया बेच्न हिँडेकी महिलालाई लछारपछार गरेको छ।
वीर अस्पतालको बीच बाटोमा दुइटा थर्मस बोकेर चिया बेच्न हिँडेकी महिलामाथि तीन जना नगर प्रहरीले जबर्जस्ती थर्मस खोसेको भिडिओ सामाजिक सञ्जाल एक्समा भाइरल भइरहेको छ।
भिडिओमा नगर प्रहरीले महिलाबाट थर्मस खोसेर लगेको देखिन्छ। सो क्रममा महिलाले कराउँदै प्रतिकार गर्न खोजेकी छन्।
नगर प्रहरी ईश्वर वाग्लेले भने उक्त घटनाको गलत व्याख्या गरिएको बताए।
'उहाँ संकटा मन्दिरनेर बसिरहनुभएको थियो,' उनले भने, 'त्यहाँ पुनः निर्माणको काम भइरहेको हुँदा नबस्न हामीले आग्रह गरेका थियौं। तर नमानेपछि हटाएका हौं।'
महिलालाई कुनै चोट नलागेको उनको दाबी छ।
...
