काठमाडौं । नेपाली युवाको सिर्जनशीलता, डिजिटल प्रतिभा र अथक परिश्रमलाई एउटै मञ्चमा उभ्याउँदै चर्चित स्वदेशी फर्निचर ब्रान्ड सोफा हब काठमाडौं ले आयोजना गरेको ‘कन्टेन्ट क्रिएटर अवार्ड–२०८३’ भव्य रूपमा सम्पन्न भएको छ। केवल एउटा अवार्ड वितरण कार्यक्रम मात्र नभई, नेपाली युवाको क्षमता, सीप र सिर्जनशीलताको उत्सव बनेको उक्त समारोहले सहभागीहरूको मन जित्नुका साथै स्वदेशी उद्योगप्रति नयाँ विश्वास पनि जगाएको छ।
शुक्रबार साँझ भक्तपुरमा आयोजित विशेष समारोहमा देशभरका सयौँ प्रतिस्पर्धीमध्ये उत्कृष्ट प्रदर्शन गर्दै अनिश चापागाईँ ले ‘कन्टेन्ट क्रिएटर अवार्ड–२०८३’ को प्रतिष्ठित उपाधि जित्न सफल भए। विजेताका रूपमा उनले एक लाख रुपैयाँ नगद पुरस्कार, सम्मानपत्र तथा ट्रफी प्राप्त गरे। उनको सफलता केवल व्यक्तिगत उपलब्धि नभई नेपाली डिजिटल कन्टेन्ट सिर्जनाको नयाँ इतिहासका रूपमा समेत हेरिएको छ।
प्रतिस्पर्धामा छनोट भएका ३२ जना उत्कृष्ट कन्टेन्ट क्रिएटर बीच भएको कडा प्रतिस्पर्धामा ‘टिम ४४४’ दोस्रो स्थान हासिल गर्दै ५० हजार रुपैयाँ नगद पुरस्कार प्राप्त गर्न सफल भयो। त्यसैगरी, सागर पाण्डे र श्रीजन श्रेष्ठ ले संयुक्त रूपमा तेस्रो स्थान हासिल गर्दै जनही २५ हजार रुपैयाँ नगद पुरस्कारसहित सम्मानपत्र प्राप्त गरे।
यस अवार्डको विशेषता भनेको निष्पक्ष मूल्याङ्कन प्रणाली थियो। चर्चित हास्यकलाकार सन्दीप क्षेत्री र अनुभवी भिडियो निर्माता सम्राट अधिकारी सम्मिलित निर्णायक मण्डलले भिडियोको गुणस्तर, मौलिकता, सिर्जनशीलता, प्रस्तुति शैली तथा ब्राण्डसँगको सशक्त सम्बन्धलाई आधार बनाएर विजेता छनोट गरेका थिए।
समारोहलाई सम्बोधन गर्दै कलाकार सन्दीप क्षेत्री ले युवालाई सफलता कहिल्यै छोटो बाटोबाट नआउने भन्दै निरन्तर मेहनत, अनुशासन र सही प्रक्रियामा विश्वास गर्न आग्रह गरे। उनले डिजिटल प्लेटफर्ममा सिर्जनशीलता देखाउने युवाहरू नै नेपालको भविष्य भएको उल्लेख गर्दै यस्ता कार्यक्रमले नयाँ प्रतिभालाई उजागर गर्ने विश्वास व्यक्त गरे।
कार्यक्रमको अर्को महत्वपूर्ण आकर्षण पत्रकारिता क्षेत्रमा पुर्याएको उल्लेखनीय योगदानको सम्मान थियो। समाजप्रति जिम्मेवार र तथ्यपरक पत्रकारितालाई उच्च सम्मान दिँदै रातोपाटी डटकम का सहायक सम्पादक राजकुमार सिग्देल लाई ‘उत्कृष्ट पत्रकारिता सम्मान–२०८३’ प्रदान गरिएको थियो। सो सम्मानले निष्पक्ष पत्रकारिताप्रतिको सम्मान र सामाजिक उत्तरदायित्वलाई अझ मजबुत बनाएको सहभागीहरूको प्रतिक्रिया थियो।
कार्यक्रमका प्रमुख अतिथि तथा नेपाल चेम्बर अफ कमर्स का अध्यक्ष कमलेश कुमार अग्रवाल ले नेपाली उद्योगको विकासमा सोफा हब ले खेलेको भूमिकाको खुलेर प्रशंसा गरे। उनले विदेशी फर्निचरको आयातलाई प्रतिस्थापन गर्दै नेपाली उत्पादनलाई बजारमा स्थापित गराउन कम्पनीले गरेको योगदान अनुकरणीय रहेको बताए। स्वदेशी उत्पादनको गुणस्तर, आधुनिक डिजाइन र उपभोक्तामैत्री सेवाले नेपाली उद्योगलाई नयाँ उचाइमा पुर्याइरहेको उनको भनाइ थियो।
कार्यक्रममा आमा छोदिङ्मो गाउँपालिका का अध्यक्ष बुचुङ तामाङ, कागेश्वरी मनोहरा नगरपालिका वडा नं. ९ का अध्यक्ष अनिल थापा, नेपाल उद्योग वाणिज्य संघ काठमाडौं का महासचिव प्रेमहरि मैनाली, राष्ट्रिय स्वतन्त्र पार्टी का केन्द्रीय सदस्य हिमेश पन्त, पर्यटन व्यवसायी रामप्रसाद सापकोटा लगायत विभिन्न क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो।
समारोहलाई अझ मनोरञ्जनात्मक र उत्साहपूर्ण बनाउन चर्चित गायिका सिर्जना खत्री (हाउडे माया), रेखा पोखरेल लगायतका कलाकारहरूले सांगीतिक प्रस्तुति दिएका थिए। उनीहरूको प्रस्तुतिले कार्यक्रममा उपस्थित दर्शकलाई भरपूर मनोरञ्जन प्रदान गरेको थियो।
कार्यक्रमको अन्त्यतिर कम्पनीका संस्थापक तारालाल धरेल ले भावुक हुँदै ‘नेपाली श्रम र सीपको सम्मान’ भन्ने मूल उद्देश्यका साथ सोफा हब अघि बढिरहेको बताए। उनका अनुसार, कम्पनीले केवल फर्निचर उत्पादन मात्र गरिरहेको छैन, हजारौँ नेपालीको सपना, रोजगारी र आत्मविश्वास निर्माण गर्ने अभियानसमेत सञ्चालन गरिरहेको छ।
धरेलले हाल सोफा हबका ११ वटा शाखा देशभर सञ्चालनमा रहेको जानकारी दिँदै जनकपुरमा १२औँ शाखा उद्घाटनको तयारी अन्तिम चरणमा पुगेको बताए। साथै, कम्पनीले प्रत्यक्ष रूपमा ३०० भन्दा बढी नेपालीलाई रोजगारी प्रदान गरिरहेको उल्लेख गर्दै आगामी दिनमा नेपाली उत्पादनलाई अन्तर्राष्ट्रिय बजारसम्म पुर्याउने महत्वाकांक्षी लक्ष्य रहेको घोषणा गरे।
आजको प्रतिस्पर्धात्मक बजारमा विदेशी ब्रान्डहरूको प्रभाव बढिरहेका बेला सोफा हब ले नेपाली श्रम, नेपाली सीप, नेपाली कच्चा पदार्थ र नेपाली आत्मविश्वासलाई आधार बनाएर सफलता हासिल गर्नु आफैंमा प्रेरणादायी उदाहरण बनेको छ। यही कारणले कम्पनीले केवल व्यवसायिक सफलता मात्र हासिल गरेको छैन, स्वदेशी उत्पादनप्रतिको विश्वासलाई पनि मजबुत बनाएको छ।
‘कन्टेन्ट क्रिएटर अवार्ड–२०८३’ ले स्पष्ट सन्देश दिएको छ—प्रतिभाको सम्मान गर्ने संस्था कहिल्यै केवल व्यवसायमा सीमित हुँदैन। समाज, सिर्जनशीलता, रोजगारी र राष्ट्र निर्माणलाई साथ लिएर अघि बढ्ने कम्पनी नै दीर्घकालीन रूपमा सफल हुन्छ। नेपाली प्रतिभा र स्वदेशी उत्पादनलाई एउटै मञ्चमा सम्मान गर्दै सोफा हब काठमाडौं ले आफूलाई केवल फर्निचर कम्पनी नभई नेपाली सपनाको विश्वसनीय साझेदारका रूपमा स्थापित गर्ने दिशामा अर्को महत्वपूर्ण पाइला चालेको छ।
