काठमाडौं । सानै उमेरमै आफ्नो गायन, अभिनय र प्रस्तुतीकरण क्षमताबाट सबैको ध्यान आकर्षित गरिरहेका बालप्रतिभा सम्राट सिं टण्डन ले नयाँ गीत “साँच्चै तिमी भगवान हौ बाबा–आमा” सार्वजनिक गरेका छन्। आमाबाबाको अथाह माया, त्याग र समर्पणलाई केन्द्रमा राखेर निर्माण गरिएको यो गीतले यतिबेला दर्शक तथा श्रोतामाझ विशेष चर्चा बटुल्न थालेको छ।
आधुनिक जीवनशैली र व्यस्तताबीच अभिभावकको योगदान ओझेलमा पर्दै गएको अनुभूति भइरहेका बेला सम्राटको यो गीतले भने प्रत्येक सन्तानलाई आफ्ना बाबा–आमाको महत्व पुनः सम्झाइदिएको छ। गीतका शब्द र दृश्यहरूले अभिभावकले सन्तानका लागि गर्ने निस्वार्थ संघर्ष, सपना र समर्पणलाई मार्मिक रूपमा प्रस्तुत गरेका छन्।
गीतमा सम्राट सिं टण्डन र पुजा देवकोटा को स्वर रहेको छ। गीतका शब्द तथा संगीत तिलक बस्नेत ले सिर्जना गरेका हुन् भने संगीत संयोजन सुदिप सागर ले गरेका छन्। शब्द, संगीत र स्वरको सन्तुलित संयोजनले गीतलाई अझ हृदयस्पर्शी बनाएको छ।
गीतको भिडियो सिर्जन बराल ‘ऋषि’ को निर्देशनमा तयार गरिएको हो। भिडियोमा परिवारभित्रको आत्मीय सम्बन्ध, अभिभावकको संघर्ष र सन्तानप्रतिको प्रेमलाई जीवन्त ढंगले उतारिएको छ। टेकेन्द्र शाह को सम्पादन र चक्रबहादुर बराल को छायांकनले भिडियोको भावनात्मक पक्षलाई अझ सशक्त बनाएको छ।
भिडियोमा लोकबहादुर टण्डन, हिमा टण्डन, सम्राट सिं टण्डन, पुजा देवकोटा र सान्वी टण्डन ले अभिनय गरेका छन्। कलाकारहरूको स्वाभाविक अभिनयले गीतको भावलाई दर्शकसम्म गहिरो रूपमा पुर्याएको छ।
विशेषगरी बालप्रतिभा सम्राट सिं टण्डनले सानै उमेरमा देखाएको परिपक्व गायन र अभिनय क्षमताले धेरैलाई प्रभावित बनाएको छ। उनको प्रस्तुति हेर्दा भविष्यमा नेपाली संगीत क्षेत्रमा एक सम्भावनाशील कलाकारको उदय भइरहेको अनुभूति हुन्छ।
आमाबाबालाई समर्पित यो गीत केवल मनोरञ्जनको माध्यम मात्र नभई परिवार, संस्कार र सम्मानको सन्देश बोकेको भावनात्मक सिर्जना बनेको छ। त्यसैले पनि “साँच्चै तिमी भगवान हौ बाबा–आमा” ले धेरै दर्शकको मन छोएको छ र सामाजिक सञ्जालमा सकारात्मक प्रतिक्रिया प्राप्त गरिरहेको छ।
