राजन थापा
काठमाडौं / सामाजिक सेवा, स्वास्थ्य सचेतना तथा मानव सेवाको उद्देश्यलाई आत्मसात गर्दै ॐ समाज डेण्टल अस्पतालले एकैदिन दुई फरक स्थानमा स्वास्थ्य तथा योगसम्बन्धी शिविर सम्पन्न गरेको छ।
समुदायस्तरमै पुगेर स्वास्थ्य सेवा प्रदान गर्ने उद्देश्यले सञ्चालन गरिएको उक्त कार्यक्रमले स्थानीय नागरिकमा सकारात्मक सन्देश प्रवाह गर्नुका साथै स्वास्थ्यप्रति जागरण फैलाएको छ। चन्द्रागिरी नगरपालिकाको सहकार्यमा आयोजित बृहत् योग शिविरमा सहभागी योग प्रशिक्षकहरूले नियमित योग अभ्यासले शरीरलाई स्वस्थ, मनलाई सकारात्मक तथा जीवनलाई अनुशासित बनाउने बताएका थिए।
कार्यक्रममा सहभागीहरूले योग केवल शारीरिक व्यायाम नभई आत्मिक शान्ति, मानसिक सन्तुलन र स्वस्थ जीवनको महत्वपूर्ण आधार भएको अनुभव समेत साझा गरेका थिए। कार्यक्रममा स्वास्थ्यप्रति सचेतना फैलाउने उद्देश्यले विभिन्न योग अभ्यास, ध्यान तथा स्वस्थ जीवनशैलीसम्बन्धी जानकारी प्रदान गरिएको थियो।
त्यसैगरी, पवित्र धाम बद्री नारायण, नागार्जुन–७ भिमढुंगा रामकोटमा ॐ समाज डेण्टल अस्पताल तथा M.N. Hospital को संयुक्त आयोजनामा एकदिने निःशुल्क स्वास्थ्य तथा दन्त शिविर सम्पन्न भएको छ। धामका महासचिव विनोद ढकालको विशेष व्यवस्थापनमा सम्पन्न उक्त शिविरमा स्थानीय बासिन्दाहरूको उत्साहजनक सहभागिता रहेको थियो।
शिविरमा M.N. Hospital का चिकित्सकहरूको टोलीले डा. बिनोद कडेलको नेतृत्वमा स्वास्थ्य सेवा प्रदान गरेका थिए भने दन्त चिकित्सकहरूको टोलीले बनस्थली शाखा प्रमुख सबिना पपन गुरुङको नेतृत्वमा दाँतसम्बन्धी परीक्षण तथा परामर्श सेवा दिएको थियो।
शिविरमार्फत सेवाग्राहीहरूले निःशुल्क स्वास्थ्य परीक्षण, दन्त परीक्षण, आवश्यक परामर्श तथा स्वास्थ्यसम्बन्धी जानकारी प्राप्त गरेका थिए। कार्यक्रममा डा. दीक्षा चौधरी र सहायक क्रिस्टिना थापा मगरको सक्रिय सहभागिता रहेको थियो।
त्यसैगरी डाक्टर सोफिया राउत, डाक्टर सिमा यादव तथा सहायक जुनु पण्डितको सहकार्यमा फरक–फरक दुई स्थानमा शिविर प्रभावकारी रूपमा सञ्चालन गरिएको थियो।
नैकाप शाखा प्रमुख अन्जना खड्काको नेतृत्वमा अर्को टोलीले स्वास्थ्य सेवा व्यवस्थापन तथा समन्वयको जिम्मेवारी सफलतापूर्वक निर्वाह गरेको थियो। सामाजिक अभियानता प्रकाश कुँवरको यसाे भन्छन् “समाजमा सेवा गर्ने नाममा प्रचार धेरै हुन्छ, तर व्यवहारमा काम गर्ने संस्था कम छन्।
ॐ समाज डेण्टल अस्पतालले भने भाषण होइन, प्रत्यक्ष सेवा दिएर मानवताको उदाहरण प्रस्तुत गरेको छ।” बनस्थली शाखा प्रमुख सबिना पपन गुरुङले स्वास्थ्य सेवा केवल अस्पतालभित्र सीमित हुन नहुने बताउँदै समुदायमै पुगेर सेवा दिन पाउँदा आत्मसन्तुष्टि मिलेको प्रतिक्रिया दिइन्।
उनले दन्त स्वास्थ्यप्रति जनचेतना अभिवृद्धि गर्न यस्ता शिविर प्रभावकारी हुने विश्वास व्यक्त गर्दै आगामी दिनमा पनि सामाजिक उत्तरदायित्वअन्तर्गत यस्ता कार्यक्रमलाई निरन्तरता दिइने बताइन्। त्यसैगरी नैकाप शाखा प्रमुख अन्जना खड्काले एकैदिन दुई फरक स्थानमा कार्यक्रम सञ्चालन गर्नु चुनौतीपूर्ण भए पनि सम्पूर्ण टिमको मेहनत, समन्वय र सेवाभावका कारण कार्यक्रम सफल भएको बताइन्।
स्थानीय नागरिकको सहभागिता र विश्वासले आगामी दिनमा अझ प्रभावकारी रूपमा सामाजिक सेवा विस्तार गर्ने प्रेरणा दिएको उनको भनाइ थियो। सामाजिक अभियानता पत्रकार राजन थापाले समाजमा धेरै नागरिक अझै आधारभूत स्वास्थ्य सेवाबाट वञ्चित रहेको अवस्थामा यस्ता कार्यक्रम अत्यन्त आवश्यक रहेको बताए। उनले अस्पतालहरू केवल व्यापारिक केन्द्र नभई मानव सेवाको अभियान बन्नुपर्ने उल्लेख गर्दै ॐ समाज डेण्टल अस्पतालले समाजमै पुगेर दिएको सेवा उदाहरणीय रहेको धारणा व्यक्त गरे। “स्वास्थ्य र योगलाई जनस्तरसम्म पुर्याउनु भनेको केवल उपचार होइन, स्वस्थ र सचेत समाज निर्माण गर्ने अभियान हो,” उनले भने, “समाज परिवर्तन भाषणले होइन, व्यवहारिक सेवाले सम्भव हुन्छ भन्ने उदाहरण यो कार्यक्रमले दिएको छ।” आयोजक संस्थाका अनुसार समाजमा स्वास्थ्य सचेतना अभिवृद्धि गर्नुका साथै आर्थिक रूपमा कमजोर तथा स्वास्थ्य सेवाबाट टाढा रहेका नागरिकसम्म सहज रूपमा सेवा पुर्याउने उद्देश्यले यस्ता कार्यक्रम सञ्चालन गरिएको हो।
स्थानीयवासी तथा समाजसेवीहरूले ॐ समाज डेण्टल अस्पतालको सामाजिक सेवामूलक अभियानको खुलेर प्रशंसा गरेका थिए। “योग, स्वास्थ्य र मानव सेवा नै स्वस्थ समाज निर्माणको आधार हो” भन्ने सन्देशसहित सम्पन्न यी कार्यक्रमले समुदायमा सकारात्मक ऊर्जा, सामाजिक एकता र सेवाभावलाई अझ मजबुत बनाएको विश्वास गरिएको छ।
