काठमाडौं ।क्रान्तिकारी कम्युनिस्ट पार्टी नेपालको घोषणा सभा सम्पन्न भएको छ।
शनिवार काठमाडौमा रहेकाे स्काई दरबार काे हलमा १३४ओैँ मजदुर दिवसको अवसरमा पार्टी एकत घाेषणा कार्यक्रम सम्पन्न भयकाे हाे ।
नेकपा (बहुमत) र नेकपा (क्रान्तिकारी माओवादी) बीच एकता भएर पुनर्गठन भएको क्रान्तिकारी कम्युनिस्ट पार्टी नेपालको घोषणासभामा सम्बोधन गर्दै अध्यक्ष माेहन वैद्य किरणले एकता नेपाली क्रान्तिको ऐतिहासिक आवश्यकताको अभिव्यक्ति रहेको बताए । नेपाली जनता, पार्टी नेता–कार्यकर्ता र योद्धाले इतिहासमा धेरै रगत बगाएको सन्दर्भ उठाउँदै अध्यक्ष किरणले विगतमा जनताले अद्वितीय योगदान गरेर पनि आन्दोलनमा दक्षिणपन्थी संशोधनवाद प्रबल हुँदा जनताले चाहेको जनवादी सत्ता प्राप्त हुन नसकेको र अब यो एकता तथा यसले निर्माण गरेको नयाँ क्रान्तिकारी धार र मूल प्रवाहले मरणासन्न प्रतिक्रियावादी संशोधनवादी शक्ति र दलाल पुँजीवादी सत्ता ढालेर वैज्ञानिक समाजवाद स्थापना गर्ने बताए ।
वैदेशिक प्रतिक्रियावाद र साम्राज्यवादको इशारामा पुराना संसद्वादी शक्तिलाई विस्थापित गर्दै नामै नसुनिएका पात्र र समूहहरू अचानक आए पनि यो साम्राज्यवादको सीधासिधी उपस्थिति मात्र रहेको र सर्वहारा वर्ग कमजोर भएको मौकाको फाइदा उठाएर झुल्किएका साम्राज्यवादका नयाँ दलालहरूलाई पनि नयाँ जनवादी क्रान्तिले बढारिदिने अध्यक्ष किरणको भनाइ थियो । उनले भने, ‘जङ्गलमा सिंह बिरामी भयो भने स्यालहरू कराउन थालेजस्तै भएको हो । अब सिंह उठिसकेको छ । अब स्यालको शासन चल्दैन ।’ क्रान्तिकारीहरूबीच एकता र ध्रुवीकरणको ढोका खुलेको भन्दै नेता किरणले महाधिवेशनसम्म जाँदा मशाललगायत क्रान्तिकारीहरूसँग एकता भइसक्ने विश्वास व्यक्त गरे ।
पार्टी बनाएर सत्तामा जानका लागि नभएको प्रस्ट पार्दै अध्यक्ष किरणले दलाल पुँजीवादी सत्ता अन्त्य गरेर जनसत्ता स्थापना गर्नका लागि भएको यो एकताले क्रान्तिकारीहरूबीच एकता र ध्रुवीकरणका लागि मार्गप्रसस्त गरेको पनि बताए।
पार्टीका प्रवक्ता धर्मेन्द्र बास्तोला ‘कञ्चन’ ले हिजो एउटा आवश्यकताले पार्टीमा फुट र विभाजन भएको भए पनि क्रान्तिको आवश्यकता र विकसित चेतनाका कारण क्रान्तिकारी शक्तिहरूबीच पुनः एकता भएको प्रस्ट पारे । यो एकता सामान्य परिघटना र इतिहासको पुनरावृत्ति नभएर हिजो एकताकेन्द्र निर्माण भएपछि जनयुद्ध आरम्भ भएझैँ क्रान्तिको आवश्यकता पूरा गर्न, सहिद, बेपत्ता योद्धा र घाइतेका अधुरा सपना साकार पार्न भएको यो एकताले प्रतिक्रियावादी र संशोधनवादीहरूले बजारमा चलाएको क्रान्ति असम्भव छ भन्ने हल्ला खारेज गर्दै क्रान्ति सम्पन्न गरेरै छोड्ने उद्घोष गरे ।
जनयुद्धका उपलब्धिहरू स्वाहा पार्दै तत्कालीन पार्टीको मूल नेतृत्व साम्राज्यवादको शरणमा परे पनि यो एकता र यसले आरम्भ गरेको क्रान्तिकारी शक्तिबीचको ध्रुवीकरण अभियानले लुटेरा वर्गको सत्ता अन्त्य गरिदिने ठोकुवा नेता कञ्चनले गरे । अब सर्वहारा वर्गले पछिल्लो प्रविधि प्रयोग गरेर क्रान्तिलाई विजयसम्म लैजाने विश्वास नेता कञ्चनको थियो । उनले भने, ‘उत्पीडित, अपहेलित, शोषित जनतालाई जसले सम्बोधन गर्न र समेट्न सक्छ, उसैले क्रान्तिमा विजय हासिल गर्न सक्छ । त्यो काम अब क्रान्तिकारी कम्युनिस्ट पार्टीले गर्छ।
साम्राज्यवादले देशको राष्ट्रियता, जनतन्त्र र जनजीविकामाथि हैकम जमाएको तर शासकहरू उसैको सेवा गरिरहेको सन्दर्भ उठाउँदै नेता कञ्चनले जनताले देश र श्रमिक जनतालाई यो सङ्कट र उत्पीडनबाट मुक्त गर्न जनयुद्धजस्तै क्रान्ति चाहेको र क्रान्तिकारी शक्तिहरूले क्रान्तिकै माध्यमबाट देश र जनताको इच्छा र आवश्यकता पूरा गरिदिने पनि बताए । दलाल पुँजीवादी सत्ता पूर्ण रूपले असफल भइसकेको र संसद्वादी शक्तिहरूप्रति जनताको चरम अविश्वास रहेकाले अब क्रान्तिको उभार आउने र जनता मुक्त हुने विश्वास प्रवक्ता कञ्चनले व्यक्त गरे । उमेरले क्रान्ति गर्ने नभएर विचार, दृष्टिकोण, लाइन र सिद्धान्तले क्रान्ति गर्ने भएकाले यही अनुभवी, प्रौढ र क्रान्तिकारी नेतृत्वबाट क्रान्ति सम्पन्न हुने नेता कञ्चनले बताए ।
कार्यक्रममा सल्लाहकार समितिका अध्यक्ष असारे काकाले क्रान्ति सजिलो विषय नभए पनि जनयुद्धको पहलकर्तामध्येका अधिकांश नेता क्रान्तिकारी लाइनमाा भएकाले क्रान्ति सम्पन्न हुने विश्वास व्यक्त गरे । जनताको आधारभूत समस्या समाधान गर्ने क्रान्तिकारी पार्टी आवश्यक रहेको र यो एकताले त्यो शक्ति प्राप्त भएको भन्दै अब दृढ विश्वासका साथ क्रान्तिमार्गमा अग्रसर हुनुपर्ने पार्टी सल्लाहकार काकाले बताए । आफू ८२ वर्षको भए पनि मनले अझै क्रान्ति खोजिरहेको र क्रान्तिमै रमाउन चाहिरहेको भन्दै उनले युवा क्रान्तिकारीहरूलाई अझै उत्साहित पारे । अर्का सल्लाहकार कमल चौधरीले नेपालको कम्युनिस्ट आन्दोलनमा विचलन आएकै कारण क्रान्ति सम्पन्न हुन नसकेको भन्दै अब यो एकताले क्रान्ति सम्पन्न गर्ने दिशातिर अघि बढाउने विश्वास व्यक्त गरे ।
नेकपा मशालका पोलिटब्युरो सदस्य चिन्तामणि पौडेलले पार्टी एकता घोषणासभामा शुभकामना मन्तव्य दिँदै मालेमावादीहरूबीच क्रान्तिकारी ध्रुवीकरण हुनुपर्ने र आफ्नो पार्टी पनि निकट भविष्यमै एकता प्रक्रियामा आउने बताएका थिए ।
कार्यक्रमकाे अध्यक्षता सिपि गजुरेल (गाैरव)ले गरेका थिय भने संचालन हेमन्त प्रकाश ओेलि (सुदर्शन) र स्वागत मन्तब्य कार्यलय सदस्य राम सिंह श्रिसले गरेकाे कार्यक्रममा पार्टी एकता घोषणा वक्तव्य वाचन गर्दै पार्टी कार्यालय सदस्य उदयबहादुर चलाउने (दीपक) ले यो विशिष्ट प्रकारको एकता नवीन क्रान्तिको घोषणा रहेको र अर्को जनयुद्धको पूर्वतयारीसमेत रहेको बताए ।
कार्यक्रममा राजधानी वरिपरिका छिमेकि जिल्लाबाट जनमासकाे सहभागीता रहेकाे थियाे । भने बिचबिचमा जनवादी कलाकारहरुद्वारा साँस्कृतिक प्रस्तुतिहरु प्रर्दसन गरियकाे थियाे ।