काठमाडौं । प्रेम केवल भावनाको अभिव्यक्ति मात्र होइन, विश्वास, समर्पण र पारस्परिक सम्मानको आधार पनि हो। यही गहिराइलाई आत्मसात् गर्दै गायक तथा संगीतकार विहिन दोङले आफ्नो नयाँ तामाङ प्रेम गीत ‘सेम न्हाङरी’ सार्वजनिक गरेका छन्। आइतबार बौद्धस्थित सेकुवा जंक्शनमा आयोजित पत्रकार सम्मेलनमार्फत यस गीतको अफिसियल म्युजिक भिडियो सार्वजनिक गरिएको हो।
‘सेम न्हाङरी’ शुद्ध प्रेमभावमा आधारित गीत हो, जसले मायामा विश्वास, सद्भाव, र समर्पणको महत्त्वलाई उजागर गर्छ। प्रेम केवल शब्दहरूमा सीमित हुँदैन, यो अनुभूतिको सुन्दर यात्रा हो, जहाँ घात-प्रतिघातको ठाउँ हुँदैन।
यसअघि गायक विहिन दोङको संगीत तथा आवाज रहेको ‘ङला लिला गुङरी च्यागो’, ‘कसम कसम’, ‘सेमतिङ’, ‘अड्कल लसी आपिन माया’ जस्ता प्रेमगीतहरू अत्यधिक लोकप्रिय भएका छन्। डम्फु मिडिया मार्फत सार्वजनिक गरिएको **‘सेम न्हाङरी’**को अफिसियल अडियो भने पहिल्यै सार्वजनिक भइसकेको थियो।
शब्द तामाङ पत्रकार संघका संघीय सदस्य तथा मिशन समृद्ध नेपालका अध्यक्ष सुदिन दोङले लेखेका छन्। संगीत स्वयं गायक विहिन दोङले दिएका छन् भने गायनमा दोङलाई चर्चित गायिका जितु लोप्चनले साथ दिएकी छिन्। उनीहरूको स्वर समन्वयले गीतलाई झनै मनमोहक बनाएको छ।
गीतको म्युजिक भिडियो निर्देशन तथा सम्पादन तामाङ चलचित्रका महानायक अमिर दोङले गरेका छन्। छायांकन त्रिलोक तामाङले गरेका छन्, जसमा गायक विहिन दोङसँगै अभिनेत्री तथा मोडल अम्बिका तामाङ र अस्मिता तामाङको मुख्य अभिनय रहेको छ। साथै, चर्चित हास्यकलाकार कुईसाङ रुम्बालाई समेत देख्न सकिन्छ।
गीतको अडियो एरेञ्ज चाद सिंले गरेका छन् भने मिक्सिङ अर्पण तामाङले गरेका छन्। समग्रमा, गीतको संगीत संयोजन र शब्दहरूको गहिराइले प्रेमका विविध आयामलाई कलात्मक रूपमा प्रस्तुत गरेको छ।