काठमाडौं । ग्रील तथा स्टील व्यवसायी संघ काठमाडौंको १४औँ स्थापना दिवस राजधानीको सानो गौचरनस्थित रानीमहल पार्टी प्यालेसमा भव्य, उत्साहपूर्ण तथा व्यवसायीहरूको उल्लेखनीय उपस्थितिबीच सम्पन्न भएको छ। स्थापना दिवस केवल औपचारिक समारोहमा सीमित नरही व्यवसायीहरूको एकता, व्यवसायको भविष्य, संगठन सुदृढीकरण, व्यवसायिक सुरक्षा र आधुनिकीकरणका विषयमा गम्भीर बहस तथा प्रतिबद्धताको साझा मञ्चका रूपमा परिणत भएको थियो।
कार्यक्रमको सञ्चालन संघका महासचिव यमबहादुर श्रेष्ठ (पशुपति) ले गरेका थिए भने कार्यक्रमको सभापतित्व संघका अध्यक्ष सुनिलकुमार अमात्य ले गरेका थिए। कार्यक्रममा ग्रील तथा स्टील व्यवसायी महासंघ नेपालका अध्यक्ष ठुलो बाबु श्रेष्ठ प्रमुख अतिथिका रूपमा उपस्थित थिए भने महासंघका वरिष्ठ उपाध्यक्ष अमृतबहादुर श्रेष्ठ तथा महासंघका सल्लाहकार समिति संयोजक निरञ्जनकुमार श्रेष्ठ विशिष्ट अतिथिका रूपमा सहभागी भएका थिए।
त्यसैगरी महासंघका उपाध्यक्षहरू, महासचिव, सचिव, कोषाध्यक्ष, सहसचिव, सहकोषाध्यक्ष, केन्द्रीय सदस्यहरू, संस्थापक अध्यक्ष मधुबहादुर कार्की, संस्थापक सदस्यहरू, महासंघका सल्लाहकारहरू, प्रहरी वृत्त मालीगाउँका इन्चार्ज प्रहरी नायब उपरीक्षक धनबहादुर बोहोरा, काभ्रेपलाञ्चोक जिल्ला अध्यक्ष सत्यनारायण वादे, भक्तपुर जिल्ला अध्यक्ष किशोर खाईतु तथा ललितपुर जिल्ला अध्यक्ष भागवत सुवेदी लगायतको उल्लेखनीय उपस्थिति रहेको थियो।
कार्यक्रमको स्वागत मन्तव्य तथा स्थापना दिवसको औचित्यमाथि प्रकाश पार्दै सभापति एवं संघका अध्यक्ष सुनिलकुमार अमात्य ले १४ वर्षको यात्रालाई संघर्ष, समर्पण र निरन्तरताको कथा भएको बताए। उनले संघ स्थापना गर्दा देखिएका चुनौतीहरू स्मरण गर्दै आज संघ व्यवसायीहरूको साझा भरोसाको केन्द्र बन्न सफल भएको उल्लेख गरे।
उनले व्यवसायीहरूलाई भावुक अपिल गर्दै भने, “हामी सबै एउटै परिवारका सदस्य हौं। व्यवसायमा समस्या आउन सक्छन्, चुनौती आउन सक्छन्, तर संगठित रूपमा अघि बढ्दा कुनै पनि समस्या ठूलो हुँदैन। हाम्रो एकता नै हाम्रो सबैभन्दा ठूलो शक्ति हो।”
अमात्यले पछिल्लो समय व्यवसायमा देखिएका आर्थिक चुनौती, बजारको अस्थिरता तथा बढ्दो प्रतिस्पर्धाबीच व्यवसायलाई आधुनिक, सुरक्षित र व्यवस्थित बनाउनु समयको आवश्यकता भएको बताए।
शुभकामना मन्तव्यका क्रममा काभ्रेपलाञ्चोक जिल्ला अध्यक्ष सत्यनारायण वादे ले व्यवसायीहरूबीचको आपसी सहकार्यले मात्र उद्योग तथा व्यवसायको दिगो विकास सम्भव हुने बताए। उनले व्यवसायमा अनुशासन, पारदर्शिता र संगठनप्रतिको प्रतिबद्धतालाई बलियो बनाउनुपर्ने धारणा राखे।
भक्तपुर जिल्ला अध्यक्ष किशोर खाईतु ले वर्तमान आर्थिक अवस्थाले साना तथा मध्यम व्यवसायीहरूलाई प्रत्यक्ष असर पारेको उल्लेख गर्दै व्यवसायीहरूलाई हतोत्साहित नभई संगठनको छातामुनि एकजुट हुन आग्रह गरे। उनले भने, “समस्या सबैलाई छ, तर समाधान पनि सामूहिक प्रयासबाट मात्रै सम्भव हुन्छ।”
ललितपुर जिल्ला अध्यक्ष भागवत सुवेदी ले काठमाडौं, भक्तपुर, ललितपुर र काभ्रेपलाञ्चोकसहित देशभरका व्यवसायीहरूबीच अझ सशक्त समन्वय आवश्यक रहेको बताए। उनले संगठनले व्यवसायीहरूको हकहितका लागि थप सक्रिय भूमिका खेल्नुपर्ने आवश्यकता औँल्याए।
विशिष्ट अतिथि तथा महासंघका सल्लाहकार समिति संयोजक निरञ्जनकुमार श्रेष्ठ ले व्यवसायीहरूलाई समयअनुसार आफूलाई परिवर्तन गर्न आग्रह गरे। उनले पुरानो कार्यशैलीबाट मात्रै अब व्यवसायलाई प्रतिस्पर्धी बनाउन नसकिने उल्लेख गर्दै आधुनिक प्रविधि, सुरक्षा मापदण्ड र व्यवस्थापन प्रणालीलाई प्राथमिकता दिनुपर्ने बताए।
उनले व्यवसायीहरूको सुरक्षा, श्रमिकहरूको स्वास्थ्य र कार्यस्थलको सुरक्षित वातावरणलाई बेवास्ता गर्न नहुने चेतावनी दिए। “आजको व्यवसाय केवल आम्दानीको विषय होइन, जिम्मेवारी र गुणस्तरको विषय पनि हो,” उनले भने।
संस्थापक अध्यक्ष मधुबहादुर कार्की स्थापना दिवस समारोहमा विगत सम्झँदै भावुक बने। उनले संघ स्थापना गर्दाको अवस्था स्मरण गर्दै सीमित स्रोत, सीमित सदस्य र अनेक चुनौतीका बीच सुरु गरिएको अभियान आज हजारौं व्यवसायीहरूको साझा संगठनका रूपमा विकसित भएको बताए।
उनले भने, “१४ वर्षअघि हामीले एउटा सपना देखेका थियौं। व्यवसायीहरूलाई संगठित गर्ने, अधिकारका लागि आवाज उठाउने र व्यवसायलाई सम्मानित पेशाका रूपमा स्थापित गर्ने सपना। आज त्यो सपना विस्तार भएको देख्दा गर्व लाग्छ।”
उनले नयाँ पुस्ताका व्यवसायीहरूलाई संगठनप्रति जिम्मेवार बन्न आग्रह गर्दै संस्थापकहरूको योगदानलाई निरन्तरता दिन आह्वान गरे।
महासंघका वरिष्ठ उपाध्यक्ष अमृतबहादुर श्रेष्ठ ले व्यवसाय सञ्चालन गर्दा कानुन, विधि र नियमको पूर्ण पालना गर्नुपर्नेमा जोड दिए। उनले अव्यवस्थित व्यवसायले सम्पूर्ण क्षेत्रको छवि बिगार्ने भएकाले सबै व्यवसायी जिम्मेवार बन्नुपर्ने बताए।
उनले श्रमिक सुरक्षादेखि उत्पादनको गुणस्तरसम्मका विषयमा व्यवसायीहरू सजग हुनुपर्ने धारणा राख्दै महासंघले व्यवसायीहरूको क्षमता अभिवृद्धि तथा तालिमका कार्यक्रमहरूलाई अझ विस्तार गर्ने प्रतिबद्धता व्यक्त गरे।
कार्यक्रमका प्रमुख अतिथि तथा ग्रील तथा स्टील व्यवसायी महासंघ नेपालका अध्यक्ष ठुलो बाबु श्रेष्ठ ले व्यवसायीहरूलाई एकताको सूत्रमा बाँध्ने प्रेरणादायी सम्बोधन गरेका थिए।
उनले देशको आर्थिक विकासमा ग्रील तथा स्टील व्यवसायीहरूको योगदान महत्वपूर्ण रहेको उल्लेख गर्दै व्यवसायीहरूको हकहित, सुरक्षा र सम्मानका लागि महासंघ निरन्तर सक्रिय रहने बताए।
उनले भने, “व्यवसायीहरू विभाजित भए कमजोर हुन्छन्, संगठित भए शक्तिशाली बन्छन्। आजको आवश्यकता भनेको एकता, अनुशासन र साझा लक्ष्य हो।”
उनले व्यवसाय सञ्चालन गर्दा विधि, विधान र कानुनको परिधिभित्र रहेर अघि बढ्नुपर्नेमा जोड दिँदै जिल्ला संघहरू र महासंघले संगठन व्यवस्थापनमा अझ प्रभावकारी नेतृत्व दिनुपर्ने बताए। साथै व्यवसायको आधुनिकीकरण, व्यवसायिक स्वास्थ्य सुरक्षा र दक्ष जनशक्ति उत्पादनमा विशेष ध्यान दिनुपर्ने धारणा व्यक्त गरे।
सम्पूर्ण वक्ताहरूले संगठनको सुदृढीकरण, व्यवसाय आधुनिकीकरण, श्रमिक स्वास्थ्य तथा सुरक्षा, व्यवसायिक अनुशासन र कानुनी व्यवस्थाको पालनामा जोड दिँदै व्यवसायीहरूको बलियो एकता नै भविष्यको सफलता र सुरक्षाको आधार भएको निष्कर्ष निकाले।
१४औँ स्थापना दिवस समारोहले केवल उत्सव मनाउने काम मात्र गरेन, बरु व्यवसायी समुदायलाई नयाँ ऊर्जा, नयाँ दिशा र थप संगठित भएर अघि बढ्ने प्रेरणा समेत दिएको सहभागीहरूको भनाइ थियो।
कार्यक्रमभरि उत्साह, आत्मीयता र एकताको भावना देखिन्थ्यो। १४ वर्षको यात्रालाई सम्झँदै व्यवसायीहरूले आगामी दिनमा अझ सशक्त, आधुनिक र व्यवस्थित संगठन निर्माण गर्ने प्रतिबद्धता व्यक्त गरेका थिए। स्थापना दिवस समारोह व्यवसायी जगतमा दीर्घकालीन प्रभाव छोड्ने ऐतिहासिक कार्यक्रमका रूपमा सम्पन्न भएको आयोजकले जनाएको छ।
कार्यक्रमको समापन ग्रील तथा स्टील व्यवसायी संघ काठमाडौंका वरिष्ठ उपाध्यक्ष अनिलकुमार श्रेष्ठले गरेका थिए ।
